اسلام آباد۔4ستمبر (اے پی پی):پاک فضائیہ خیبرپختونخوا ، سندھ، بلوچستان اتے جنوبی پنجاب دے سیلاب توں متاثرہ علاقیں اچ ریسکیو تے ریلیف آپریشنز کیتے ودھ توں ودھ وسائل وقف کیتن، پاک فضائیہ دی طرفوں جاری بیان اچ آکھیا ڳئے جو پاک فضائیہ ہیلی کاپٹرمتاثرہ علاقے اچ راشن، دوائیں ضروری سامان دی ایئر ڈراپ کارروائیاں اچ ودھ چڑھ تے حصہ گھندا پئے جݙاں جو پی اے ایف دے اہلکار وی سیلاب متاثرین دی بحالی دے عمل اچ سول انتظامیہ دا ہر ممکن تعاون کریندے پئن۔ڈپٹی چیف آف ائیر سٹاف ایڈمنسٹریشن ائیر مارشل حامد رشید رندھاوا حیدرآباد دے نیڑے پی اے ایف ریلیف کیمپ دا معائنہ کیتا۔انہاں سیلاب متاثرین کوں ݙتیاں ڳیاں سہولتاں تے اطمینان دا اظہار کیتے۔ انہاں پرے دے علاقیں جلدی کارروائیاں تے امدادی کارروائیاں کوں جاری رکھݨ تے پی اے ایف دی ایمرجنسی ریسپانس ٹیماں دی پیشہ ورانہ مہارت دی وی تعریف کیتی۔ایں توں پہلے ائیر آفیسر کمانڈنگ ناردرن ائیر کمانڈ ائیر وائس مارشل حکیم ر??ا سیدو شریف ڈیٹ دی طرفوں کیتاں ڳیاں امدادی سرگرمیاں دی نگرانی کیتی۔ مقامی لوکاں تے سول انتظامیہ پی اے ایف دی امداد تے بحالی دیاں کوششاں دی تعریف کیتی ۔سیلاب متاثرین دی مشکلات گھٹ کرݨ کیتے پی اے ایف دی ایمرجنسی ریسپانس ٹیماں گزریل چووی گھنٹے اچ 1,853 خشک راشن بیگز 1,960 پاݨی دیاں بوتلاں تے 11,860 پکے ہوئے کھاݨے دے پیکٹس ونڈین ، پاک فضائیہ دی طرفوں لاتے ڳئے فیلڈ میڈیکل کیمپاں اچ پی اے ایف دی میڈیکل ٹیماں دے ذریعے 3,644 مریضاں دا وی علاج کیتا ڳئے ۔
